फलटण दि.०६| तरडफ जिल्हा परिषद केंद्र शाळेमध्ये आषाढी एकादशीच्या पार्श्वभूमीवर शनिवारी (ता. ५) भक्तिभावाने नटलेला दिंडी सोहळा उत्साहात पार पडला. विठूनामाच्या गजरात व पांडुरंगाच्या जयघोषात पार पडलेल्या या सोहळ्यात शाळेतील विद्यार्थी, शिक्षक, पालक व शिक्षकेतर कर्मचारी यांनी उत्स्फूर्तपणे सहभाग घेतला. महाराष्ट्राच्या संत परंपरेची आणि आषाढी वारीची संस्कृती विद्यार्थ्यांपर्यंत पोहोचवण्याच्या उद्देशाने आषाढी एकादशीच्या पार्श्वभूमीवर तरडफ येथील जिल्हा परिषद केंद्र शाळेमध्ये दिंडी सोहळ्याचे आयोजन करण्यात आले होते. या पारंपरिक सोहळ्याच्या निमित्ताने विद्यार्थ्यांनी विठ्ठल-रखुमाईच्या वेषात पालखीसह शाळेच्या परिसरात दिंडी काढली. शाळेत पोहोचल्यावर आरती, गोल रिंगण, फुगडी आणि भक्तिगीते यांच्या माध्यमातून संपूर्ण वातावरण भक्तिरसात रंगून गेले. या सोहळ्यात शिक्षक, विद्यार्थी, पालक आणि शिक्षकेतर कर्मचारी मोठ्या संख्येने उपस्थित होते. या दिंडी सोहळ्याच्या माध्यमातून विद्यार्थ्यांमध्ये श्रद्धा, एकात्मता आणि सांस्कृतिक मूल्यांची जाणीव निर्माण करण्यासाठी शाळेच्या मुख्याध्यापक व सर्व शिक्षकांनी विशेष प्रयत्न केल्याचे या सोहळ्याच्या आयोजक शिक्षक कर्मचारी यांनी सांगितले.
